|
Written by Mizo Aw
|
|
Friday, 30 July 2010 00:00 |
BSI Zone Meet
Bible Society of India, Aizawl Auxiliary chuan naktuk July ni 31 leh August ni 1-ah hian Chhinga Veng Presbyterian Kohhran Biak Inah Aizawl City Area North Zone Meet vawingana an nei dawn a, thupui ‘Pathian Thu-Nun Tidanglamtu’ a ni. Pathian Thu sawi bakah zaipawl hrang hrangten zaia rawngbawlna an nei ang.
MZP-in Lawmpui Dawn
MZP General Headquarters chuan MZP Platinum Jubilee lawmna atan vawiin hian Aizawl khawpuia College hrang hranga Students Union hruaitute leh hnam puam hruaitu degree course pass-te lawmpuina I&PR Auditorium-ah chawhnu dar 2:00-ah hian an nei dawn a, lawmpuina thuziak leh MZP Platinum Souvenir pek an ni ang. Inlawmpuina a nih bakah Collge SU leh Hnam Pual Zirlai Pawl hruaitu hluite thlahna leh a tharte lawmna a ni pahfawm a ni.
Ruihhlo Do Phurpui Zel
July ni 22 leh 27 inkarah khan Central YMA CADS hnenah ruihhlo do phurpuina leh thlawp nan tanpuina pe mi 9 an awm a, Rs.10,000 petu pahnih Pu Lal Thanzara (Patea), Zarkawt leh hming thup an awm a, S.A. India Eastern Territory Yong People Congress (Naupang Inkhawmpuilian) chuan Rs.5,000 an pe a, Rs.3,000 petu Venghlui Branch YMA, Chaltlang Branch YMA an ni a, Rs.2,000 petu Pu Vanlaltluanga, Hlimen, Chanmari West Branch YMA an ni. Rs.1,000 pe Aibawk MHIP leh Rs.500 petu Lalsangluaia Renthlei, Aibawk an ni.
PARDC Resolution
Pay Anomaly Redressal Demand Committee nimin piaha Vana Pa Halla inkhawm chuan ni 21.6.2010-a Mizoram Cabinet Meeting thutlukna angin Pay Anomaly-te siamtha a, a hma thei ang bera sawrkarin 6th.Pay a hmantir an ngen a. Pay siamthatu tur Committee a rang thei ang berin sawrkarin din rawh se an ti. He inkhawma kalte chu a tul ang zela thawhho an remti a, an harsatna theuhte ziaka lakhawmin a hlawma sawrkarah thehluh ni se an ti bawk.
ZNP-in Tuarpui
Nizan hmasa ruah sur nasa avanga Mizoram hmun hrang hranga leimin avanga chhiatna tawk chhungkua zawng zawngte leh nunna hial chante ZNP chuan pawi an ti a, an tuarpui thu sawiin Pathianin awmpui se an duh thu an sawi. Heng vanduaina tawkte hi sawrkarin a theih anga ranga chhawmdawlna pe turin an phut.
CM Relief Fund
Chief Minister Relief Fund-ah Falkland Congress Unit, Aizawl chuan Rs.2,000 an pe a, CM Relief Fund hi mi mangang leh harsa, tanpui ngaite hnena pek chhuah thin a ni.
Kumin Teachers Day
Kumin Teachers Day Sept. ni 5 hman dan tur nimin khan Education Minister Pu Lalsawta hovin an rel a, kum dang ang bawka hman a ni ang.
Vuiliam
Entlang nitin chanchinbu Editor Pu Lalbiakzama pa Pu Chalngura, 78 nimin piah tlaia thi chu nimin khan an veng Zonuam thlanmualah vuiliam a ni. |
