mizoaw.com

Thuthar thehdarh leh puanzar kawnga
department hrang hrang thawhhona Inter Media Publicity Coordination Committee (IMPCC) chuan thlatin thupui neia puanzar uarbik an neih \hinah August thla chhung atan ‘Chi leh chi inkara boruak tha’ (communal harmony) an thlang a.Hnam hrang, chi hrang leh sakhaw hrang inkara boruak \ha siam, inngeihna boruak siam leh thla leh ralmuang taka awm hi a pawimawh ngawt mai.
Hetia IMPCC-in ‘Chi leh Chi inkara boruak \ha’ thupui atana an thlang hian awmzia a neih chu hei hi Mizoramin a mamawh niin an hria a ni ngei ang. Tun hnaiah khan Mizoram Governor Lt.Gen.M.M.Lakhera chuan MJA memberte a kawmnaah thil eng emaw a lo thlen changin Mizo leh Mizo lo inkarah chantir zel lo turin a ngen bawk a. Tun hnai lawka Union Minister Sachin Pilot Aizawl zin pawh khan India ramah a rampui (mainland) leh ram thlaler deuh awm anga sawi dawn chuan a remti lo hle a, ‘mainland leh mainland lo a awm lo a, mainland vek a ni’ a ti a. Ram thlaler bika awma inngaihna te, ngaihsak loh leh thlauhthlak bika inngaihna te, mi dangte laka inngaihhranna leh inlakhrannate hi mi tamtakin an nei \hin a. Hei hi a pawi hle a ni.
Bru helten Bung\huam tlangval an that a, misual emaw helhovin emaw thil pawi an khawih a,  pawisawilo tlangval pakhat an that ni mai lovin Bru-in Mizo an that emaw,  Bru leh Mizo inkar angah ngaiin Bru-ho in tamtak hal a ni a. Hetikhawpa nun zalen leh hmeichhiate mipa tana itawm thei ang bera an incheina ramah hian pawngsualte a thlengleh hlauh \hin a. A bikin hnam dangin pawi an lo tawh chang hian hnam dang chuan Mizo a nih vanga that/pawngsual,etc. angah mi \henkhatten an kalpui vat \hin.
Pawngsual a lo awm a, a pawngsualtu chu hnam dang a lo ni a. Hnam dang misualin mi a pawngsual ni ta mai lovin hnam dang zawng zawng curfew an ni a. Lalpiangliana’n a puzawn MB Rai a that a, amah inpuangin Police hnenah a inpe a. Tumahin Lalpiangliana chu an dem lo. Lalpiangliana chu police kut leh jail chhunga a awm hnuin damdawi inah a thi a. Tanhril khuaa Gorkhali awm zawng zawngte tiam chin awm lova curfew (pawn chhuak lo tura ngen) tih ang vel hi chu a dik lo em em a ni.
Heng zawng zawng, hnam leh hnam inkara boruak \ha lo siam zawng te, a hnam zawnga intuartir zawng tea tuten emaw thil an tih \hin hian  politics te, kohhran te, YMA te, MHIP te, MUP te a\ang chuan tumahin hetiang hi a dik lo e, tih loh tur a ni tingam an awm lo a. Chanchinbute zingah pawh a tingam chu tlem te an ni.
Nikum November thlaa Bru in tamtak halsak an nih te khan kohhran leh tlawmngai pawlten hetiang tur a ni ngai love, misual, mi dik lo, hel thil tih a ni e, ti duh leh tingam an awm hauh lo a. Kohhran Upa leh Pastor zingah pawh Bru hote laka rum tak taka thu sawi an awm a ni an ti a, dik tak maw? Khatla Vengah naupang pakhat pawngsual a ni a, hnam dang zawng zawng tiamchin awm lovin curfew an ni a, tute mahin hetiang hi a dik lo a ni tih pawh an sawi chhuak ngam lo.
Khata pawngsualtua puh chu hnam dang a ni a, a pa a\anga Mizorama awm tawh an ni a, Mizote ang bawka Mizo \awng pawh thiam a ni a. Mizorama piang a ni. Mahse, ILP a nei lo tihte chu ringtaka sawi a ni a, Mizorama piang, Mizorama sei lian tan ILP a ngai em tihte pawh hi ngaihtuah tham a ni.
University-ah hnathawktu an han la dawn a, Mizo leh hnam dang issue bawkin a han kal leh a. University hi zirna \ha atan nge, zirtirtu tura Mizote inlak (employment) leh induhsakna atana tih pawh hriat theih loh khawpin Vice Chancellor um chhuah tum thlengin \an lak a ni a. Hnam dang ngaih theih lohte hi Mizona, ram hmangaihna emaw ti tawkte pawh an awm emaw tih mai tur a ni.
Anmahni zingah anmahni chungah chuan Mizote hi an la \ha hlein a lang. Khawngaihnate pawh hi an ngah hlein a lang. Mite \anpuite pawh hi an peihin tlawm pawh an ngai. Zoram tluchhe mek te pawh han ti \hin mah ila, Mizote hi a pumpuia lak chuan mi \ha an la tam em em a ni. Mahse, hnam dang laka an rilru put hmangah chuan insiam\hat tur an nei a ni.
Eng emaw a lo thlen chang hian, thil sual leh thil dik lo titute hnam dang an lo nih palh chang hian chi leh chi, hnam leh hnam inkara boruak \ha lo siam tumten an lu an rawn tun vat \hin a. Hei tak mai hi ven a ngai a ni. A venna \haber chu hetianga chi leh chi leh hnam leh hnam inkar anga thil lak \hin hi a dik lo a ni tia dem, sawisel leh thlawp loh ngam a ni. Hetiang thil a lo thlen chang hian chi leh chi inkarah boruak \ha lo siam tum an awm palh ang e, emaw a chhuak palh ang e, tiin boruak \ha siam zawnga \an lak thuai \hin ni se. Chutiang atan chuan sawrkar, political party te, kohhran, YMA, MHIP leh MUP te hi an \ha khawp ang tih a rinawm. IMPCC pawhin tih theih a nei ngei ang.Tin, chi leh chi inkara boruak \ha siam tur leh boruak \ha lo veng turin Media-te an puitlin a ngai em em bawk.