mizoaw.com

Thil man sang chungchang chuan nimina parliament in hnih inkhawm a nghawr a, eptu memberte chuan thinurtakin thil man sang chungchang chu a tawpa vote lak theihnaa sawihona neih an nawr a, sawrkarin a remti lo a ni. Lok Sabha leh Rajya Sabha-ah chuan thil man sang chungchangah hian eptu member zawng zawng an inlungrual titih a,  BJP, Left Party-te leh Congress ni lo party-te chuan oil man tihsan avanga July ni 5-a Bharat Bandh an neih ang khan tanrualna an nei a ni.
Congress leh sawrkar chuan Lok Sabha-ah tih tur dangte chawlhtira thil man sang chungchang sawihona neih (adjournment motion) leh Rajya Sabhaah a tawpa vote lak theiha sawihona neih chu an remtih dawn loh thu an lo puang lawk tawh a ni. Congress leh sawrkar chuan thil man chu thil che reng (on going thing) a ni tiin adjournment motion chu pawm theih a ni lo an ti a ni.
Lok Sabhaa eptu hruaitu Sushma Swaraj chuan oil (fuel) man to chuan mi narante fairelbel (budget) a tibuai a ni a ti a, eptu lam zawng zawng chu sawihona neih duhin an tangrual a, eptu member eng emawzat chuan adjournment motion an thehlut a ni. Pi Swaraj chuan “Kan adjourment motion pawm ula, sawihona neih phal rawh u” tih pahin sawrkar lama party thenkhatte pawhin eptu lam duh dan hi an duhpui a ni a ti a. Sawrkar thlawptu Samajwadi Party President Mulayam Singh Yadav leh RJD President Lalu Prasad pawh thil man sang sawiselin house laili lamah an kal chhuak a ni.
UPA-a party lianber dawttu Trinamool Congress pawhin sawihona neih an duh a, an party Chief Whip Sudip Bandhyopadhyay chuan parliament pawnah a party chuan sawihona neih a duh a, mahse, eptuten a tawpa vote lak ngaia sawihona an ngiat erawh chu an thlawp lo a ni a ti.
Rajya Sabha leh Lok Sabha inkhawm chu tan hnu rei lo te-ah darkar khat chhung chawlhtir a ni a, chhun dar 12:00 hnu lawkah Rajya Sabha chu nileng atan chawlhtir a ni.Hetia thil man sang chungchang sawihona eptuten an ngiat lai hian chaw man san dan chu 12.47 p.c. a ni a, thil man tlangpui san dan chu 10.55 p.c. a ni.
Lok Sabha inkhawm chu chhunchaw ei hun hmain tumhnih chawlhtir a ni a, a hmasain darkar khat, a vawihnihnaah chawhnu dar 2:00 thleng chawlhtir a ni a, chawhnu dar 2:00-ah chuan nileng atan chawlhtir a ni ta a ni.
SP leh RJD member-te chuan “Sawrkar thil ti thei lo hi thlak kan duh a ni” tin Lok Sabha House lailiah an aurual a ni. Lok Sabhaah chuan bengchheng karah Petroleum Minister Murli Deora thusawi copy house dawhkanah pharh a ni a,  Finance Minister  Pranab Mukherjee chuan RBI, Insurance Act, Security Contract leh SEBI Act siamthatna tur Bill a pulut a ni.