Larsapin Mizoram Hmasawnna Tlangpui Sawi Tlangram Lo Neihna 36%-in Tlahniam A Ti
India Republic Day vawi 63-na nimin chu ram chhung hmun dangte ang bawkin Mizoramah pawh hmun hrang hrangah lawm a ni a, a lawmna pui ber Aizawl Ramhlun Sports Complex-ah dar 9:00 a.m.-ah Mizoram larsap Pu Vakkom Purushothaman chuan hnam puanzar pawtpharhin parade contingent 26-ten hnam puanzar chibai an buk chu a lo chhang.
Mizoram larsap a nih hnua Republic Day a hman hmasakna berah hian Governor Pu Vakkom Purushothaman Mizoram sawrkarin kum khat kal ta chhunga a hnathawh hrang hrang tlangpui a sawi.
Mizoram Governor chuan India ram zalenna sualtute leh ram hruaitu hmasaten mahni inphat a, an inpekna hlu tak azarah ram ropui tak leh Danpui hmathlir zau leh huapzo India mipuiten an lo nei thei a ni, a ti a. Larsap chuan India ram chu Danpuiin a kenkawh tlat, mipui rorelna ram a nihna ziarang hlutna leh \hatnate vawnghim a, tichak a, chhawm nung zela intiam thar leh turin mipui a chah a ni.
Larsap chuan ram hmasawnna atan chuan muanna boruak a \ul a ni a ti a, hemi kawngah hian Mizoram chuan hneh taka dan leh thupek kengkawhtute a neih bakah NGO te, kohhran leh an hnuaia pawl hrang hrang te, chanchinbumite leh mipuiten ram ralmuang ber a nih zel theihna tura dan leh thupek kengkawngtute an \awiawm reng avangin a vanneihthlak a ni a ti.
Governor chuan ei leh bara ram dinhmun siam\hatna tur leh mi retheite chawikanna tura duan, NLUP chuan nghawng a neih tan mek thu sawiin he ruahmanna \ha tak leh a thil tum tihlawhtling tur hian NLUP dawngtu zawng zawngte chu anmahni eizawnna thlan \heuhah rinawmna leh tumruhna nen, taima taka thawk turin a ngen a. NLUP hnuaiah hian eizawnna peng hrang hrang atan chhungkaw 45,139 thlan chhuah an nih tawh thu a sawi.
Minute 14 chhung thu a sawinaah larsap chuan ei leh bara ram hmasawnna hnukpui chu lo neih leh a zawmpui hna peng hrang hrang hmasawnna nen a inthlun zawm tlat a ni, a ti a. Loneitute leh hnathawktute hmasawnna tel lovin Mizoram hi ram nuamsa a nih tak tak thei ngai dawn loh avangin Mizoram sawrkar chuan kawng hrang hrangin loneitute ham\hatna a ngaihtuah sak thu a sawi. Larsap chuan kum 2010-2011 chhung khan tlangram lo neihna hmun za zela 36% velin a tlak hniam thusawiin 11 Five Year Plan tir lama 44,947 hectare a\angin hemi kum chhung hian 28,735 hectare-ah a tlahniam a ni, a ti a. Hetianga tlangram lo neihna hmun a zim sawtna chhan hi Watershed Development Programme for Shifting Cultivation Areas (WDPSCA), Oil Palm Development Programme leh Sugarcane Cultivation Programme te kalpui a nih vang a ni a ti bawk. Larsap chuan thar chhuah a pun deuh deuh theih nan kut hnathawktute chu kawng hrang hranga chhawmdawl leh \anpui an ni tiin thlai chin dan leh enkawl dan \ha zawkte kawhhmuh an niin training leh enchhinnate neihpui an nih bakah thlai chi \ha leh thlai \iakte ngaihtuahsak an nih thu te a sawi bawk.
Larsap chuan India ram mau awm zaa 14 chu Mizoramah a awm thu sawiin Mizorama industry-a hma lakna tur pawimawh tak pakhat chu mau sawngbawlna lam hi a ni a ti. Governor chuan Industry hmasawn nan leh mihring nunphung chawikan nan Power & Electricity mamawh a nih thu sawiin Mizoram sawrkarin hemi kawngah hmun hrang hranga hma laknate a sawi a. Hmasawnna atan inkalpawhna kawng \ha a \ul thu sawiin India sawrkar Look East Policy hnuaiah Mizoram kaltlanga Myanmar pawha tuifinriat thleng pawhtu tur Kaladan Multi Modal Transit Transport Project chu kum 2014 hian peih hman tura ruahman a ni a ti.Mihring thiamna tihpun leh hman tlaka chherna tur kawng dapna lam sawrkar-in a ngaih pawimawh thusawiin Champhai, Kolasib, Lawngtlai, Mamit, Saiha leh Serchhip-ah te Polytechnic Institutes din tum a ni a ti. Thingtlang khua zawng zawng ah leh khawpui ah tui thianghlim hnianghnara pe thei tura sawrkar hma lakna hrang hrang kal mekte pawh a sawi chhuak bawk.
(Phek 2-ah zawm)
Basic Services to Urban Poor (BSUP) scheme hnuaiah Chite, Lawipu, Rangvamual leh Durtlang-ahte mi rethei zual leh chenna in nei lote tan housing project 4 hmangin mi rethei in tur sak mek a nih thu Governor chuan sawiin hei hian khawpuia mi rethei chhungkaw 1,096 te a khung leng thei dawn a ni a ti. 13th Finance Commission hnuaia grants for Urban Local Bodies chu Aizawl khawpui chhung enkawlna hna hrang hrang, bawlhlawh sawngbawlna, tui supply, thlanmual enkawl, tuihawk luankawr siam nan leh in sak khuahkhirhna dan kenkawh hna thawh nante Aizawl Municipal Council kutah hlan a ni tawh a ni a ti. Aizawl Municipal Council chu mawhphurhna tam zawk nen mahnia ro rel theia thuam chak chhoh mek a ni a ti.
Governor chuan Autonomous District Council 3 te pawhin nasa takin hma an sawn thu sawiin Mizoram sawrkarin heng Autonomous District Council area-te mamawh leh a bika an harsatnate chu a hria a, a ngaihven a ni a ti.
Larsap chuan NGO zawng zawng te, Kohhran, \halai leh mipui ten ram hmasawnna atan leh muanna boruak vawnghim tura an thawh avangin lawmthu a sawi a. Mizo hnam nuna bet rinawmna, aia upa zahna leh tlawmngaihna nen hnam nunze mawi chhawm nung a, Mizo nihna humhalh tlat chungin India ram hmun zau zawka chengte nen zai khatah lungrual taka an luanza theih nghet taka a rin thu a sawi bawk.
Ramhlun Sport Complex-a Republic Day lawmna sawrkar buatsaihah hian Chief Minister Pu Lal Thanhawla leh a nupui Pi Lal Riliani; Speaker Pu R. Romawia; Council of Ministers; Parliamentary Secretaries, MLA engemawzat, political party hruaitute, sawrkar officer pawimawhte leh school naupangte an tel a ni.